केआईआईटीमा प्रिसा साह मृत्यु घटना : परराष्ट्रले थाल्यो कूटनीतिक पहल

सुनौलो नेपाल

शुक्रवार , बैशाख १९, २०८२

केआईआईटीमा प्रिसा साह मृत्यु घटना : परराष्ट्रले थाल्यो कूटनीतिक पहल

पर्सा । परराष्ट्र मन्त्रालयले भारतको ओडिसा राज्यस्थित कलिङ्गा इन्स्टिच्युट अफ इन्डस्ट्रियल ट्रेक्नोलोजी (केआईआईटी) मा अध्ययनरत वीरगञ्जकी प्रिसा साहको मृत्यु भएको घटनाको छानबिनका निम्ति कूटनीतिक पहल प्रारम्भ गरेको छ । छात्रा साह बिहीबार बेलुका आफ्नै कोठामा मृत भेटिएकी थिइन् ।

परराष्ट्रमन्त्री डा आरजु राणा देउवाले शुक्रबार सामाजिक सञ्जाल फेसबुकमार्फत भारतको केआईआईटीमा अध्ययनरत नेपाली छात्रा प्रिसा साह आफ्नै होस्टेल कोठामा मृत भेटिएको घटनाबाट आफू मर्माहत भएको बताउँदै “परराष्ट्र मन्त्रालयले घटनालगत्तै हिजो नै भारत सरकार, ओडिसा सरकारका उच्च अधिकारीहरु र दिल्लीस्थित नेपाली दूतावासमार्फत घटनाको सत्य, तथ्य छानबिन गर्न कूटनीतिक पहल थालेको छ”, उल्लेख गरेकी छिन् ।

तीन महिनाको अवधिमा यो क्याम्पसमा दोस्री नेपाली छात्राले ज्यान गुमाएकी छिन् । यसअघि बुटवलकी प्रकृति लम्सालको मृत्यु हुँदा नेपाली विद्यार्थीसमेत असुरक्षित भएर घर फर्किने अवस्था बनेको थियो ।