काठमाडौँ । "स्वदेशमै शिक्षा, सबैको इच्छा” भन्ने मूल नाराका साथ काठमाडौँमा १२ औं ‘नेपाल हायर एजुकेसन फेयर’ आयोजना हुने भएको छ। विगत ११ वर्षदेखि स्वदेशी उच्च शिक्षाको प्रवर्द्धन गर्दै आएको यस मेलाको १२ औँ संस्करण यही असार २७ र २८ गते हुने भिजन इन्कर्पोरेसनका निर्देशक तारा मान रावलले जानकारी दिए ।

रावलका अनुसार कार्यक्रम काठमाडौँको नयाँ बानेश्वरस्थित द एभरेस्ट होटलमा आयोजना हुनेछ  ।

भिजन मिडिया इन्कर्पोरेसन, एजुकेसन डटकम र अनुपम एकेडेमीको संयुक्त आयोजनामा हुन लागेको यस शैक्षिक मेलाको मुख्य उद्देश्य नेपालमै उपलब्ध गुणस्तरीय उच्च शिक्षाबारे विद्यार्थी तथा अभिभावकहरूलाई सही, विश्वसनीय र प्रत्यक्ष जानकारी उपलब्ध गराउनु रहेको छ।

 साथै, स्वदेशी शिक्षाप्रति सकारात्मक धारणा विकास गर्नु पनि यसको लक्ष्य रहेको आयोजकले जनाएको छ । 

५० भन्दा बढी कलेज र शैक्षिक संस्थाहरूको सहभागितामा दुई दिनसम्म चल्ने यस मेलामा नेपालका विभिन्न विश्वविद्यालय तथा अन्तर्राष्ट्रिय विश्वविद्यालयसँग आबद्ध ५० भन्दा बढी प्रतिष्ठित कलेज तथा शैक्षिक संस्थाहरू सहभागी हुनेछन्।

 मेलामा व्यवस्थापन,सूचना प्रविधि , इन्जिनियरिङ, मेडिकल, हस्पिटालिटी, एभिएसन, मानविकी, कानुन, शिक्षा तथा विज्ञान संकायअन्तर्गतका स्नातक  र स्नातकोत्तर  तहका विभिन्न शैक्षिक कार्यक्रमहरूबारे विस्तृत जानकारी दिइनेछ ।

मेलामा काठमाडौँ युनिभर्सिटी स्कुल अफ म्यानेजमेन्ट, नेपाल पर्यटन तथा होटल व्यवस्थापन प्रतिष्ठान, शंकरदेव क्याम्पस, युनिभर्सिटी अफ नेपाल र नेपाल इन्जिनियरिङ कलेज  जस्ता देशका प्रतिष्ठित शैक्षिक संस्थाहरूको समेत सहभागिता रहनेछ।

नि:शुल्क परामर्श र आकर्षक उपहारको व्यवस्था 

मेलामा आउने विद्यार्थी तथा अभिभावकहरूका लागि नि:शुल्क शैक्षिक तथा करियर परामर्श प्रदान गरिने आयोजकले जनाएको छ । यसका साथै, आगन्तुकहरूका लागि नि:शुल्क चलचित्र टिकट, छात्रवृत्ति, लक्की ड्र तथा विभिन्न आकर्षक उपहारहरूको समेत व्यवस्था गरिएको छ।

मेलामा ५ हजारभन्दा बढी प्लस टु उत्तीर्ण विद्यार्थी तथा अभिभावकहरूको सहभागिता रहने आयोजकले अपेक्षा गरेको छ ।