काठमाडौं । एसएस फाउण्डेसनले नागार्जुन नगरपालिका–१, रानीवनस्थित बाल विकास माध्यमिक विद्यालयलाई सुविधायुक्त झोला वितरण गरेको छ । बिहीवार सामाजिक संस्था सुवर्ण समशेर फाउण्डेशनले आठ सय बढी विद्यार्थीलाई सुविधायुक्त झोला वितरण गरेको हो । राष्ट्रिय प्रजातन्त्र पार्टी (राप्रपा) का वरिष्ठ नेता पशुपति समशेर राणाले विद्यालयका सबै विद्यार्थीका लागि झोला वितरण गरेका थिए ।
झोला वितरणपछि नेता समशेरले विद्यार्थीमाथि गरिएको लगानी मुलुकको भविष्यमाथि गरिएको लगानी भएको बताए । फाउण्डेसनका अध्यक्ष तथा वरिष्ठ कलाकार मदनदास श्रेष्ठले विद्यालयमा अध्ययनरत विद्यार्थीको शैक्षिक गुणस्तर विकासका अन्य क्षेत्रमा पनि सहयोग गर्न फाउन्डेसन तयार भएको बताए । फाउण्डेसनले यसअघि मुलुकभरका दुईसय भन्दा धेरै स्वाथ्य चौकीमा ‘अक्सिजन कन्सन्ट्रेटर’ सहयोग गरेको थियो । त्यसबाहेक बाढी पहिरोका बेलामा उद्धारमा प्रयोग हुने विभिन्न उद्धार सामग्री पनि वितरण गरेको थियो ।