काठमाडौं। अमेरिकाको टेक्ससस्थित टाइलरमा शनिवार भएको सडक दुर्घटनामा परी दुई जना नेपालीको ज्यान गएको छ भने चार जना नेपाली घाइते भएका छन्। उनीहरू सवार पिकअपलाई ट्रकले ठक्कर दिएको थियो।

दुर्घटनामा परी ३४ वर्षीय सिर्जन ज्ञवाली र ११ वर्षीय बालक इमेज कार्कीको निधन भएको हो । उक्त दुर्घटनामा परी दिनेश कार्की , गङ्गा कार्की , इभान कार्की र सृजन प्याकुरेल घाइते भएका हुन् ।

प्याकुरेलको अवस्था सामान्य रहे पनि अन्य तीन जनाको अवस्था भने गम्भीर रहेको बताइएको छ । प्रहरीका अनुसार उनीहरूको स्थानीय अस्पतालमा उपचार भइरहेको छ ।