काठमाडौं । विवादास्पद भारतीय चलचित्र ‘आदिपुरुष’का लेखक मनोज मुन्ताशिर शुक्लाले माफी मागेका छन् ।

‘आदिपुरुष’ सिनेमाले हिन्दु धर्मका बारेमा गलत प्रचार गरेको र रामायणका पात्रहरूलाई गलत रूपमा चत्रण गरेको भन्दै व्यापक आलोचना भएपछि उनले सामाजिक सञ्जाल फेसबुकमार्फत माफी मागेका हुन् ।

उनले जन भावनालाई स्वीकार गर्ने पनि बताएका छन्। सुरुमा भने उनले माफी माग्न अस्वीकार गरेका थिए । उनले आफू घाइते भएको भन्दै लेखेका छन्– ‘सम्पूर्ण दाजुभाइ दिदीबहिनी, आदरणीय सन्त तथा श्रीरामका भक्तजनहरूमा हात जोडेर बिनाशर्त माफी चाहन्छु । भगवान बजरंगबलीले हामी सबैको कल्याण गरून् ।’

सिनेमाको चौतर्फी आलोचना हुँदा बक्सअफिसमा कलेक्सन पनि घटेको थियो ।