काठमाडौँ । इलाम क्षेत्र नं २ को उपचिर्वाचन शान्तिपूर्ण रुपमा सम्पन्न भएको छ । कुल एक लाख १५ हजार ८८९ मतदाता रहेको इलाम क्षेत्र नं २ मा ५७ प्रतिशत मत खसेको छ ।

निर्वाचन कार्यालयका अनुसार इलाममा करिब ६६ हजारले मतदान गरेका छन् । मतगणना आज शनिबार नै सुरु गरिने मुख्य निर्वाचन अधिकृत केशवप्रसाद घिमिरेले जानकारी दिए । अहिले सबै मतदान केन्द्रबाट सदरमुकाम इलाम बजारमा मतपेटिका ल्याइने कार्य सुरु भएको प्रमुख जिल्ला अधिकारी इन्द्रदेव यादवले बताए ।

उनले भने, ‘राति १० बजेसम्म मतपेटिका सबैतिरबाट आइपुग्ने अपेक्षा छ । आइपुग्यो भने त्यतिनै बेला सर्वदलीय बैठक बसेर निर्णय हुन्छ, चाडो मतपेटिका ल्याउन सके आजैदेखि मतगणना गर्ने तयारी गरेका छौँ ।’

भौगोलिक कठिनाइ र सडक राम्रो नभएका कारण फाकफोकथुम गाउँपालिका, चुलाचुली गाउँपालिका र माङसेबुङ गाउँपालिकाबाट इलाम सदरमुकामसम्म मतपेटिका ल्याउन समय लाग्न सक्छ । मुख्य निर्वाचन अधिकृतको कार्यालय इलामले मतगणना केन्द्रका रुमा गौतमबुद्ध सभागृहलाई तोकेको छ ।

इलाम २ मा ६ वटा पालिकाका ४२ वडाका १४९ मतदान केन्द्रबाट मतपेटिका संकलन गर्नुपर्छ । मतपेटिकाको ढुवानी ढिलो भएमा आइतबार मतगणना गर्ने तयारी छ ।