काठमाडौं ।दक्षिण कोरियाली गाडी निर्माता हुन्डाईको बहुप्रतीक्षित विद्युतीय सवारी ‘क्रेटा ईभी’ नेपालमा सार्वजनिक भएको  छ ।

नेपालमा हुन्डाई गाडीको आधिकारिक वितरक लक्ष्मी इन्टरकन्टिनेन्टल प्रालिले सोमबार काठमाडौंमा क्रेटा ईभी र क्रेटा आइसीइ (मेड इन नेपाल) सार्वजनिक गरेको हो ।

नेपाली बजारमा चार रङमा उपलब्ध क्रेटा ईभीको सुरुवाती मूल्य ५१ लाख ९६ हजार रुपैयाँ तोकिएको लक्ष्मी इन्टरकन्टिनेन्टलले जनाएको छ ।

क्रेटा ईभी चार भेरिएन्टमा उपलब्ध गराइएको छ । क्रेटा ईभी एक्जिक्युटिभको ५१ लाख ९६ हजार, क्रेटा ईभी स्मार्टको ५४ लाख ९६ हजार, क्रेटा ईभी स्मार्ट (०) को ५६ लाख ९६ हजार र क्रेटा ईभी प्रिमियमको ५९ लाख ९६ हजार रुपैयाँ तोकिएको छ ।

हुन्डाई क्रेटा ईभीमा ५१.४ किलोवाट आवरको ब्याट्री छ । क्रेटा ईभीको रेन्ज फुलचार्जमा ४ सय ७३ किलोमिटर हुने कम्पनीको दाबी छ ।

हुन्डाईको यसअघिको ईभी कोना गाडीमा प्रयोग भएको १ सय किलोवाटको मोटर रहने छ भने क्रेटा ईभीले ७.९ सेकेन्डमा शून्यबाट १ सय किलोमिटर प्रतिघण्टाको गति भेट्न सक्छ ।

यसमा १०.२५ इन्चको डुअल स्क्रिन, प्रिमियम साउन्ड सिस्टम, भेन्टिलेटेड र पावर फ्रन्ट सिट, लेभल २ एडास सिस्टम, ६ वटा एयरब्याग, ३६० डिग्री क्यामरा, डिजिटल की, इलेक्ट्रिक टेलगेट जस्ता फिचर छन् ।

हुन्डाईका अनुसार यो ईभीमा गियर सेलेक्टर पनि स्टेयरिङमै हुन्छ । यस्तै यसको अटोमेटिक फिचर अन्तर्गत भ्वाइस एक्टिभेटेड पानारोमिक सनरुफ पनि छ । क्रेटा ईभीमा भेहिकल टु लोड (भीटूएल) सुविधा पनि उपलब्ध ेछ । यसको इन्टेरियरमा लक्जरी फिचर देखिएको छ ।

हुन्डाईको आधिकारिक विक्रेता लक्ष्मी इन्टरकन्टिनेन्टलले यसअघि हुन्डाईको प्रिमियम ईभी ‘आयोनिक ५’ को दुई वटा भर्सन र कोनाको दुई वटा भर्सन नेपाल ल्याइसकेको छ ।