काठमाडौं । नेकपा एमालेकी सांसद विन्दा पाण्डेले समितिबाट पारित गरेर संसदमा पठाएका विधेयक तत्काल पास गर्नुपर्ने बताइन् । उनले समितिबाट संसदमा गएर विधेयकहरु अड्किरहँदा अर्कोपल्ट पुनः शुन्यबाट काम शुरु गर्नुपर्ने भन्दै तत्काल विधेयकहरु संसदबाट पारित गर्नुपर्ने माग गरिन् ।

उनले नीति अनुसन्धान प्रतिष्ठानले सरकारले बनाएका नीति कार्यक्रमलाई कार्यान्वयन गर्ने स्थिति कस्तो छ र जनतासमक्ष कार्यान्वयन कति भइरहेको भन्ने कुरालाई नियालेर अहिलेको समाजअनुसार परिमार्जन गर्ने कुरामा सहयोग गर्ने विश्वास लिएको बताइन् ।

उनले भनिन्, ‘हामीले जतिपनि काम गरेर आएका विधेयकहरु छन्, एक ठाउँबाट अर्को ठाउँमा गएर अड्किए भने अर्कोपल्ट फेरि यो शुन्यबाट शुरु गर्नुपर्छ । त्यसैले हामीले जतिपनि यो कार्यकालमा गरेका मिहेनत र साधन, श्रोत खेरजाने स्थिति हुन्छ, त्यसलाई ध्यानमा राखौँ । नीति तथा कार्यक्रममा पनि योजना आयोग अन्तर्गत अर्को एउटा संयन्त्र बनाउने भन्ने खालको कुराले कतै यसको अल्टरमा त होइन ? भन्ने खालको आशंकाहरु उठेका थिए । योजना आयोग नेपाल सरकारलाई नीति बनाउन सहयोग गर्ने संयन्त्र हो, नीति प्रतिष्ठानको कुरा जुन छ, हामीले बनाएका नीति, कार्यक्रमलाई कार्यान्वयन गर्ने स्थिति के गरेको छ र कार्यान्वयन भएर जाँदा अहिलेको समयको माग र समाजमा आएको परिवर्तनलाई यसले छुन सकेको छ कि छैन ? छैन भने कसरी परिमार्जन गर्नुपर्छ ? भनेर बौद्धिक, प्राज्ञिक समुदायसँग छलफल गर्ने र सरकारलाई जानकारी गराउने हो ।’