काठमाडौं । बिजी ग्रुपअन्र्तगतको अर्बिट इनर्जी लिमिटेडले प्राथमिक सेयर (आइपिओ) निष्कासन गर्ने भएको छ । कम्पनीले प्रति शेयर १०० रूपैयाँ अंकित दरको ५० लाख कित्ता साधारण शेयर आयोजना प्रभावित क्षेत्रका स्थानिय बासिन्दाहरु तथा सर्वसाधारणहरुमा निष्काशन गर्न लागेको हो ।

कम्पनीले कुमारी क्यापिटल लिमिटेडलाई धितोपत्र निष्काशन तथा बिक्रीप्रबन्धकमा नियुक्त गरेको छ ।

सम्झौता—पत्रमा अर्बिट इनर्जीका तर्फबाट महाप्रबन्धक सुदिप खड्का तथा कुमारी क्यापिटलका तर्फबाट प्रमुख कार्यकारी अधिकृत (सिइओ) पुष्प शर्माले हस्ताक्षर गरेका छन् ।

अर्बिट इनर्जीले संखुवासभा जिल्लाको सभापोखरी गाँउपालिका स्थित साभाखोलाको पानी सदुपयोग गरि २१.५ मेगावाटको सभाखोला बी र ६.३ मेगावाटको सभा खोला सी जलविद्युत आयोजना निर्माण गरिरहेको छ ।

अहिलेसम्म आयोजनाको निर्माण ५५ प्रतिशत सम्पन्न भईसकेको कम्पनीले जनाएको छ । आयोजनामा भारतको फ्लोवेल इनर्जी प्राईभेट लिमिटेड तथा इटालीको ट्रोएर एजी कम्पनीबाट निर्मित अत्याधुनिक इलेक्ट्रोमेकानिकल समाग्रीहरु जडान गरि अबको १ वर्षभित्र बिजुली उत्पादन गर्ने लक्ष्य लिएको जनाएको छ । आगामी दिनमा कम्पनीले अन्य आयोजनामासमेत लगानी गरी अगाडी बढ्ने योजना रहेको जनाएको छ ।

२५ मेगावाटको सिंगटी हाइड्रो निर्माण गरी सञ्चालन गरिरहेको ग्रुपले लम्जुङमा २६ मेगावाटको खुदी जलविद्युत आयोजना निर्माण गरिरहेको छ । खुदी जलविद्युत आयोजना आगामी एक वर्षभित्र सकिने छ ।

यस्तै ग्रुपको अगुवाइमा ९९ मेगावाटको लान्द्रुक जलविद्युत आयोजना निर्माण सुरु भएको छ भने ६१ मेगावाटको नारखोला जलविद्युत आयोजनाको क्षमता बढाएर १ सय ६० मेगावाट पुर्याउने तयारी ग्रुपको छ ।

ग्रुपले आगामी एक दशममा ५ सय मेगावाट बिजुली उत्पादन गर्ने लक्ष्य लिएको छ ।