काठमाडौं। विहान ११ बजे भनिएको प्रचण्ड- नेपाल समूहको स्थायी समिति बैठक दिउँसो ३ बजेका लागि सरेको छ।
सर्वोच्च अदालतले ऋषि कट्टेल नेतृत्वको नेकपालाई आधिकारिकता दिएपछि आफ्नो समूहको आघिकारिक धारणा बनाउन स्थायी समिति बैठक बस्ने बताएको उक्त समूहले बैठक दिउँसो ३ बजेका लागि सारेको हो।
स्थायी समिति बैठक बस्नुपूर्व उक्त समूहका अध्यक्ष पुष्पकमल दाहाल प्रचण्डको निवास खुमलटारमा तत्कालिन माओवादी केन्द्रका नेताहरुबीच छलफल भइरहेको छ। नेकपा एमाले र माओवादी केन्द्र ब्यूँताइदिने सर्वोच्चको फैसलापछि अब कसरि अगाडी बढ्ने भन्ने रणनीति बनाउन माओवादीका नेताहरुबीच छलफल भइरहेको नेता चक्रपाणी खनालले जानकारी दिए।
माओवादी केन्द्रका नेता जनार्दन शर्माले एमाले र माओवादी केन्द्र ब्यूँताइदिने सर्वोच्च अदालतको फैसला आइसकेको र यसको आशय बुझिसकिएकोले पुनरावलोकनका लागि जानुभन्दा फैसला स्वीकार गरेर त्यहीअनुसार अगाडी बढ्नुको विकल्प नभएको बताइसकेका छन्।
शर्माले माओवादी केन्द्रको तर्फबाट सरकारलाई दिएको समर्थन पनि फिर्ता हुने बताएका छन्।