बिहिवार, श्रावण ७ गते २०८३
बिहिवार, श्रावण ७ गते २०८३
बिहिवार, श्रावण ७ गते २०८३
बिहिवार , श्रावण ७, २०८३
काठमाडौं । नेपाल कम्युनिस्ट पार्टी (नेकपा)का संस्थापक महासचिव पुष्पलाल श्रेष्ठको ४८औँ स्मृति दिवस आज साउन ७ गते देशभर विविध कार्यक्रम गरी मनाइँदै छ ।
नेपाली कम्युनिस्ट आन्दोलनका शीर्ष पुरुष पुष्पलालको योगदानको स्मरण गर्दै नेकपा (एमाले) लगायत विभिन्न कम्युनिस्ट घटकहरूले विचार गोष्ठी, श्रद्धाञ्जली तथा स्मरणसभा आयोजना गरेका छन् । एमालेको बागमती प्रदेश कमिटीले पनि यस अवसरमा आज राजधानीमा विशेष कार्यक्रमको आयोजना गरेको छ ।
वि.सं. १९८१ असार १५ गते रामेछापमा जन्मिएका पुष्पलाल अमर सहिद गंगालाल श्रेष्ठका माइला भाइ हुन् । निरंकुश राणाशाही र पञ्चायती व्यवस्थाविरुद्ध प्रवासमै रहेर पनि नेपाली कम्युनिस्ट आन्दोलनलाई वैचारिक तथा संगठनात्मक रूपमा व्यवस्थित बनाउन उनले ऐतिहासिक भूमिका निर्वाह गरेका थिए ।
पुष्पलाल कार्ल मार्क्स र फ्रेडरिक एङ्गेल्सद्वारा लिखित विश्वप्रसिद्ध कम्युनिस्ट मेनिफेस्टो पहिलोपटक नेपाली भाषामा अनुवाद गर्ने व्यक्तित्व हुन् । उनले आफ्ना लेख तथा कृतिहरूमा नेपाली समाजको वस्तुनिष्ठ र वर्गीय विश्लेषण प्रस्तुत गरेका थिए ।
उनले वि.सं. २००६ वैशाखमा निरञ्जनगोविन्द वैद्य, नारायणविलास जोशी, नरबहादुर कर्माचार्य र मोतीदेवी शाक्यसँग मिलेर भारतको कोलकातामा नेपाल कम्युनिस्ट पार्टीको स्थापना गरेका थिए । त्यसअघि वि.सं. १९९८ मा नेपाली प्रजातान्त्रिक संघ गठन गर्नमा पनि उनको महत्त्वपूर्ण योगदान रहेको थियो ।
नेपालमा प्रजातन्त्र पुनःस्थापनाका लागि नेपाली कांग्रेससहितका प्रजातान्त्रिक शक्तिहरूसँग मिलेर संयुक्त जनआन्दोलन गर्नुपर्छ भन्ने वैचारिक नीति अघि सार्ने पहिलो नेता नै पुष्पलाल हुन्, जसलाई पछि २०४६ सालको आन्दोलनमा व्यावहारिक रूपमै प्रयोग गरियो ।
वि.सं. २०३५ साउन ७ गते भारतको नयाँदिल्लीस्थित अल इन्डिया इन्स्टिच्युट अफ मेडिकल साइन्सेज (एम्स) मा उपचारका क्रममा उनको निधन भएको थियो । आज उनको आदर्श र विचारलाई स्मरण गर्दै देशभरका विभिन्न कम्युनिस्ट दल तथा सम्बद्ध संगठनहरूले विविध कार्यक्रम गरिरहेका छन् ।
Be the first to comment!
© 2026 All right reserved to sunaulonepal.com
Design & Developed By
प्रतिक्रिया दिनुहोस