काठमाडौँ । पाल्पामा एक युवतीको घाँटी रेटेर बीभत्स ढंगले हत्या भएको छ ।

पाल्पाको रिब्दीकोट गाउँपालिका–१ ख्याहामा १९ बर्षीया पदमा सुनारको बीभत्स ढंगले हत्या भएको अवस्थामा शव फेला परेको प्रहरीले जनाएको छ । हत्याको विषयमा अनुसन्धान गर्नको लागि भैरहवाबाट तामिल प्राप्त कुकुरलाई घटनास्थल लगिएको जिल्ला प्रहरी कार्यालय पाल्पाका प्रमुख तथा प्रहरी उपरीक्षक नरेन्द्र चन्दले सुनौलो नेपाललाई जानकारी दिए ।

उनले भने, “मंगलबार दिउँसो ४ बजे घर नजिकैको पँधेरोमा नुहाएर फर्किने क्रममा पद्मा सुनारको हत्या भएको छ, उक्त घटनाका विषयमा हामी अनुसन्धान गर्दैछौँ ।”

उनी स्थानीय शारदा माध्यमिक विद्यालयमा कक्षा १२ मा अध्ययनरत थिइन् । शवलाई अहिले पोष्टमाट्मको लागि जिल्ला अस्पताल तानसेन लगिएको जनाइएको छ ।

मंगलबार दिउँसो ४ बजे घर नजिकैको पँधेरोमा नुहाउन गएकी पद्मा साँझ अबेरसम्म नफर्किएपछि खोजी गर्ने क्रममा हत्या भएको अवस्थामा शव भेटिएको हो । उनको शरीरका विभिन्न भागमा धारिलो हतियारले काटिएको पाइएको प्रहरीको भनाइ छ ।