एजेन्सी । श्वासप्रश्वाससम्बन्धी समस्या आस्थमा अर्थात् दमका कारण शरीरमा आवश्यक वायु सञ्चारका लागि प्रयोग हुने कोषिकाहरुमा समेत क्षति पुग्ने नयाँ तथ्य फेला परेको बेलायतका वैज्ञानिकहरुले बताएका छन् ।
किंगस कलेज लन्डनका अनुसन्धानकर्ताहरुले गरेका अध्ययनअनुसार आस्थमाको असर कम गर्न प्रयोग गरिने औषधिले जोखिम व्यवस्थित गर्नुको साटो झन् असर गर्ने गरेको पाइएको बीबीसीले जनाएको छ ।

दम भएका मानिसहरुको वायु सञ्चारका नलीहरु संवेदनशील हुने भएकाले विभिन्न प्रकारका बासनादार धुलो, उपचारका लागि अपनाइएका विशेष तरिका र व्यायामले पनि क्षति गर्नसक्ने अनुसन्धानले देखाएको खबरमा उल्लेख छ । यसका कारण खोकी लाग्ने, छाती घ्यारघ्यार हुने र सास फेर्न गाह्रो हुने भएर नलीहरु सुन्निने समस्या हुन सक्छ ।

अहिले उपलब्ध भएका औषधिले सुन्निएको कम गर्न सक्ने र वायु सञ्चार हुने नली खुला राख्न मद्दत गर्न सक्छ । तर आस्थमाको बारम्बार आक्रमणले श्वास नलीमा स्थायी दाग बस्ने र साँघुरो हुन सक्ने सम्भावना रहेको अध्ययनले देखाएको छ ।