बलिउड अभिनेता अमिर खान र किरण राव सम्बन्ध विच्छेदको घोषणा गरेको भोलिपल्ट एकसाथ देखिएका छन् । पानी फाउण्डेशनको साप्ताहिक अनलाइन कार्यक्रममा सहभागी हुँदै दुई जनाले आफूहरु निकै खुसी भएको बताएका छन् । 

अमिर खानले भने, ‘तपाईहरुले हाम्रो घोषणा सुनिसक्नुभयो होला । तपाईहरुलाई दुख पनि लाग्यो होला । राम्रो लागेन होला । तर हामी दुई जना निकै खुसी छौं । परिवार एक नै छ । हाम्रो सम्बन्धमा परिवर्तन आएको छ तर हामी सँगै नै छौं । हाम्रो लागि तपाई कामना गर्नुहोस् हामी खुसी रहौं ।’

किरण रावले पनि भनिन्, ‘हामी सधैं एकसाथ काम गर्ने तपाइलाई आश्वासन दिन चाहान्छौं ।’

पानी फाउन्डेशन कोरोना लकडाउनको बेलादेखि निकै चर्चामा रहेको कार्यक्रम आयोजना गरिरहेको छ । यो कार्यक्रममा अमिर खान र किरण राव सामिल हुँदै आएका छन् । 

दुई जनाले शनिबार संयुक्त वक्तब्य जारी गर्दै १५ वर्षको वैवाहिक जीवन टुङ्ग्याउने घोषणा गरेका थिए । 

सन् २००५ मा विवाह बन्धनमा बाँधिएका उनीहरु सहमतिमै छुटिएका हुन्। अमिर र किरणको भेट चलचित्र ‘लगान’को सेटमा भएको थियो । किरण लगानको असिस्टेन्ट डाइरेक्टर थिइन् । 

अब दुवैले नयाँ जिन्दगी जिउने बताएका छन् ।